پاک فوج کے ہیرو میجر شبیر شریف شہید نشان حیدر کا79 واں یوم پیدائش آج ملی جوش و جذبے کے ساتھ منایا جائیگا۔
میجر شبیر شریف شہید 28اپریل 1943ءکو ضلع گجرات کے علاقے کنجاہ میں پیدا ہوئے۔انہوں نے لاہور کے سینٹ انتھونی سکول اور گورنمنٹ کالج جیسے اداروں سے تعلیم حاصل کرنے کے بعد پاک فوج میں شمولیت اختیار کی اور دشمن کےخلاف لڑتے ہوئے جام ِشہادت نوش کیا۔
انہیں بہادری کے صلہ میں پاک فوج کا سب سے بڑا اعزاز نشان حیدر دیا گیا۔ یوم ِپیدائش کے سلسلہ میں شہید کو خراج عقیدت پیش کرنے کیلئے خصو صی تقریب کا اہتمام بھی کیا گیاہے۔
میجر شبیر شہید کا مختصر تعارف
میجر شبیر شریف شہید نے 19 اپریل 1964ء کو 21 سال کی عمر میں پاک فوج کی فرنٹیر فورس رجمنٹ میں شمولیت اختیار کی۔ 1965ء کی جنگ میں بطور سیکنڈ لیفٹیننٹ شریک ہوئے، دشمن کی 2 توپیں تباہ کیں، 4 فوجیوں کو جنگی قیدی بنایا، جنگ میں کمال بہادری کے اعتراف پر انہیں ستارہ جرات سے نوازا گیا۔
میجر شبیر شریف شہید1971ء کی جنگ میں وہ 3 دسمبر 1971 کو وہ بطور کمپنی کمانڈر فرنٹیر فورس رجمنٹ ہیڈ سلیمانکی کے محاذ پر تعینات تھے، اورسلیمانکی سکیٹر میں فرنٹیئر رجمنٹ کی ایک کمپنی کی کمانڈ کر رہے تھے، انہیں ایک اونچے بند پر قبضہ کرنے کا ٹارگٹ دیا گیا تھا۔ انہیں اس پو زیشن تک پہنچنے کیلئے دشمن کی بارودی سرنگوں کے علاقے سے گزرنا، اور پھر 100 فٹ چوڑی اور 18فٹ گہری ایک دفاعی نہر کو تیر کر عبور کرنا تھا،بھارتی فوج کی جانب سے شدید گولہ باری کے باوجود میجر شبیر شریف نے یہ مشکل مرحلہ طے کیا اور دشمن پر سامنے سے وار کیا، اوراسی شام تک دشمن کو اس کی قلعہ بندیوں سے باہر نکال دیا۔
6 دسمبر 1971ء کی دوپہر کو وہ دشمن کے ایک اور حملے کا بہادری سے دفاع کرتے ہوئے اینٹی ائیر کرافٹ گن سے دشمن ٹینکوں پر گولہ باری کر رہے تھے، اس دوران انہوں نے دشمن فوجیوں اور ٹینکوں کو بھاری نقصان پہنچایا ۔ اور اسی دوران انہوں نے جان ملک پہ قربان کر دی، شہادت کے وقت ان کی عمر صرف 28 سال تھی، ان کی بہادری اور جواں مردی کے اعتراف میں حکومت نے انہیں سب سے بڑے ملٹری اعزاز نشان حیدر سے نوازا۔
یاد رہے کہ میجر شبیر شریف شہید سابق چیف آف آرمی سٹاف جنرل راحیل شریف کے بڑے بھائی تھے۔
