حکومت نے سعودی عرب سے مسجد نبوی واقعے میں ملوث افراد کیخلاف کارروائی کی درخواست کردی۔

وزیرداخلہ راناثناءاللہ نے پریس کانفرنس کرتے ہوئے کہا ہے کہ گزشتہ روزمدینہ منورہ میں قابل افسوس واقعہ پیش آیا، قابل احترام مقام پرغیر شائستہ جملے بولے گئے۔انہوں نے کہا کہ مدینہ منورہ میں چیخا گیا اور بلند آواز سے نعرے لگائے گئے، مدینہ منورہ میں جو ہوا وہ اتفاقاً نہیں منظم منصوبہ بندی کی گئی، سابق وزیرداخلہ اورسابق وزیراعظم کے بیانات ریکارڈ پر ہیں۔

رانا ثناءاللہ نے کہا ہے کہ جہلم والے سابق وزیر کہتے ہیں ان کا باہر نکلنا مشکل ہوجائے گا، گزشتہ دور میں ہمیں انتقامی کارروائی کا نشانہ بنایاگیا، بےبنیاد الزامات لگائے گئے، میں نے ہر بندے کو پارٹی کے فیصلے کی خلاف ورزی کرنے سے روکا۔ وزیرداخلہ نے کہا کہ آپ نے پونے4 سال بہت امتحان لیا ہے، فرح خان کے خلاف جوالزاما ت ہیں وہ ان پر نیب اور ایف آئی اے کو جوابدہ ہیں، ایسے واقعات سے سیاست کسی اور طرف چلی جائے گی۔

انہوں نے کہا کہ مجھ پر بطور صدر پنجاب بڑا دباؤ ہے، میں نے کارکنان کو منع کیا، عمران خان اپنے خلاف کرپشن اسکینڈلز سے بچنے کے لیے کہتے ہیں سازش ہوگئی، لوگوں کو راستہ بتایا جا رہا ہے کہ مخالفین کے بچوں کو تنگ کیا جائے۔رانا ثناءاللہ نے کہا ہے کہ سائبرکرائم ونگ اظہا ررائے کی آزادی کو کسی طور نہیں دبائے گا، سوشل میڈیا پر پروپیگنڈا کیا جا رہا ہے، بابا رحمتے کی عمران خان سے ملاقات ہوئی  جو اچھی بات ہے۔

وزیرداخلہ نے کہا کہ شاہ زین بگٹی اور مریم اورنگزیب پر حملہ کیاگیا، وزارت داخلہ سعودی عرب سے مدینہ منورہ واقعے پر کارروائی کی درخواست کرے گی، سعودی حکام سے درخواست کریں گے کہ ملوث افراد کی فوٹیجز بھیجیں۔

انہوں نے کہا کہ الیکشن کمیشن کے باہر احتجاج کی کال پر پورے پنجاب سے دوہزار لوگ باہر نکلے، ایف آئی اے کا سائبر کرائم ونگ اظہار رائے پر پابندی نہیں لگائے گی۔