محکمہ موسمیات نے عیدالفطر کی تعطیلات کے دوران تیز آندھی اور گرج چمک کے ساتھ بارش کی پیش گوئی کی ہے۔

محکمہ موسمیات کے مطابق یکم مئی سے مغربی ہواؤں کا ایک سلسلہ ملک کے مغربی علاقوں میں داخل ہو گا، جو 5 مئی تک رہے گا۔

محکمہ موسمیات کا کہنا ہے کہ 2 سے 4 مئی تک اسلام آباد، راولپنڈی، مری، گلیات اور بنوں سمیت دیگر علاقوں میں گرج چمک کے ساتھ بارش کا امکان ہے۔

علاوہ ازیں خوشاب، سرگودھا سمیت دیگر ملحقہ علاقوں میں آندھی کے ساتھ ہلکی بارش کا بھی امکان ہے۔

محکمہ موسمیات نے چاغی، کوئٹہ، نوشکی، چمن، زیارت، سبی، سکھر، ڈی جی خان، لیہ، راجن پور، بھکر، ملتان میں بھی گرج چمک کے ساتھ بارش کا امکان ظاہر کیا ہے۔

محمکہ موسمیات نے کراچی، حیدر آباد، میرپور خاص، بدین اور ٹھٹھہ سمیت سندھ کے دیگر علاقوں میں تیز ہواؤں اور آندھی کی بھی پیشگوئی کی ہے۔