گورنر پنجاب کو ہٹانے   کی کوششیں جاری ہیں،  جس کیخلاف  صدر مملکت  ڈٹ گئے۔

تفصیلات کے مطابق صدر مملکت ڈاکٹر عارف علوی نے گورنر پنجاب عمر سرفراز چیمہ کو ہٹانے کی سمری اعتراض لگا کر وزیراعظم آفس واپس بھجوا دی۔

ذرائع مطابق وزیراعظم شہبازشریف نے 15 اپریل کو عمر سرفراز چیمہ کو ہٹانے کی سمری صدر مملکت کو بھیجی تھی ،جس پر قانونی ماہرین نے گورنر پنجاب کو ہٹانے پر اعتراض لگانے کی سفارش کی ۔

وزیراعظم آفس کا کہناہے کہ ایوان صدر سے واپس بھیجی گئی سمری تاحال موصول نہیں ہوئی،ذرائع کاکہناہے کہ وزیراعظم اعتراض دور کرکے سمری دوبارہ صدر کو بھجوائیں گے ۔

دوسری جانب گورنر پنجاب نے  عثمان بزدار کا استعفیٰ  ٰغیر آئینی قرار دے دیا ہے ۔

عثمان بزدار اور سپیکر اسمبلی کا کہنا تھا کہ حمزہ شہباز کا الیکشن ہی نہیں ہوا تو کیسے منتخب ہو سکتے ہیں ۔

علاوہ ازیں آج گورنر پنجاب کی جانب سے سپیکر پنجاب اسمبلی کو خط لکھا گیا جس میں کہا گیا کہ عثمان بزدار کے استعفے کو مسترد کر دیا گیا ہے ۔ خط کے بعد سردار عثمان بزدار نے پنجاب سیکرٹریٹ میں   کابینہ کا اجلاس طلب کیا  تھا۔ پنجاب اسمبلی پہنچنے والے وزارء میں میاں اسلم اقبال، ڈاکٹر مراد راس،میاں محمود الرشید،عنصر مجید نیازی، اخلاق احمد، باؤ رضوان حسین بہادر دریشک، محسن لغاری اور یاسمین راشد شامل ہیں۔ پنجاب اسمبلی آمد پر میڈیا سے گفتگو کرتے ہوئے  سردار عثمان بزدار نے کہا کہ استعفیٰ مسترد ہونے پر عہدے پر بحال ہو چکا ہوں ،  کیبنٹ اور قانونی ٹیم کی مشاورت سے آئندہ کا لائحہ عمل طے کیا جائے گا۔حمزہ شہباز کی حلف برداری کی تقریب سے متعلق سوال کے جواب پر انہوں نے کہا کہ قانونی معاملہ ہے اس پر بات نہیں کر سکتا ۔ذرائع کا کہنا ہے کہ عثمان بزدار کابینہ اجلاس کے بعد گورنر پنجاب کو اسمبلی توڑنے کا کہہ سکتے ہیں۔