وزیراعظم شہباز شریف کے معاون خصوصی حنیف عباسی نے اعلان کیا ہے کہ شیخ رشید کی وگ اتار کر لانے والےکو 50 ہزار روپے انعام دوں گا۔

راولپنڈی میں پریس کانفرنس کرتے ہوئے وزیراعظم کے معاون خصوصی حنیف عباسی نے کہا  کہ عمران خان کے ایما پرمسجد نبوی ﷺ کےافسوس ناک واقعےکی منصوبہ بندی کی گئی، بدترین دشمن کے سامنے بھی مسجد میں کوئی بات نہیں کرتا، مسجد نبوی ﷺ کے واقعے کی پلاننگ عمران خان اور  شیخ رشید نےکی، شیخ رشید کا بھتیجا بھی پلاننگ شامل رہا۔

حنیف عباسی کا کہنا تھا کہ شیخ رشیدہمارے ساتھ سیاسی مقابلہ کریں، جس حلقے سے شیخ رشید الیکشن لڑیں گے وہاں سے میں بھی وہیں لڑوں گا اور مقابلہ کروں گا، یہ جہاں جائیں گے انہیں انڈے اور ٹماٹر پڑیں گے۔

انہوں نے کہا کہ مسجد نبوی میں مریم اورنگزیب، شازین بگٹی کو گالیاں دی گئیں، ان سب لوگوں کیخلاف مقدمہ درج کر کے انہیں گرفتار کرنا چاہیے، یہ نواز شریف یا شہباز شریف کی نہیں، مدینے کے تقدس کی بات ہے، اس فعل میں شامل افراد کے خلاف سخت کارروائی ہونی چاہیے۔