وزیراعظم شہباز شریف نے کہا ہے کہ پاکستان کڈنی اینڈ لیور انسٹیٹیوٹ (پی کے ایل آئی ) کو ٹرسٹ بنایا جائے اور نرسنگ یونیورسٹی کے منصوبے کو جلد مکمل کیا جائے ۔
اسلام آباد – (اے پی پی): وزیراعظم محمد شہباز شریف نے کہا ہے کہ غریب افراد کو صحت کی معیاری سہولیات کی مفت فراہمی حکومت کی اولین ترجیحات میں شامل ہے، نادار اور مفلس طبقے کو عدم توجہ دینے کی سوچ کو بدلنے اور ان کی خدمت کو ترجیحات میں سر فہرست رکھنے کی ضرورت ہے، پاکستان کڈنی اینڈ لیور انسٹیٹیوٹ (پی کے ایل آئی ) کو ٹرسٹ بنایا جائے اور نرسنگ یونیورسٹی کے منصوبے کو جلد مکمل کیا جائے۔ وزیر اعظم آفس کی جانب سے پیر کو جاری بیان کے مطابق وزیر اعظم نے ان خیالات کا اظہار پاکستان کڈنی اینڈ لیور انسٹیٹیوٹ پر لاہور میں جائزہ اجلاس کی زیر صدارت کرتے ہوئے کیا۔
اجلاس میں وزیر اعظم کو پی کے ایل آئی کے انتظامی امور پر تفصیلی بریفنگ دی گئی۔ وزیراعظم کو بتایا گیا کہ گزشتہ سال 290کڈنی ٹرانسپلانٹ اور 190 لیور ٹرانسپلانٹ کئے گئے، مریضوں میں سے صرف 17 فیصد کو ہی مفت علاج کی سہولت فراہم کی گئی۔ وزیراعظم کو ہسپتال کے ساتھ نرسنگ یونیورسٹی کے منصوبے پر پیش رفت سے بھی آگاہ کیا گیا۔ وزیراعظم نے پی کے ایل آئی کے منصوبے کی تکمیل میں کوتاہی برتنے پر افسوس کا اظہار کرتے ہوئے پی کے ایل آئی میں مریضوں کو دئیے جانے والی موجودہ سہولیات کو غیر تسلی بخش قرار دیا۔ وزیرِ اعظم نے ہسپتال میں سہولیات کو عالمی معیار کے مطابق بنانے اور کم از کم پچاس فیصد غریب مریضوں کو مفت علاج فراہم کرنے کی ہدایات جاری کیں۔
وزیرِ اعظم محمد شہباز شریف نے کہا کہ پی کے ایل آئی کا مقصد ہی پورے ملک کے غریب اور نادار لوگوں کو مفت ٹرانسپلانٹ کی سہولت فراہم کرنا تھا تاکہ انہیں خطیر رقم خرچ کرکے علاج کیلئے دوسرے ممالک نہ جانا پڑے۔ وزیراعظم نے پی کے ایل آئی کو مالی طور ہر خود مختار بنانے کے لئے چیف سیکرٹری پنجاب کو ہدایت کی کہ وہ مکمل حکمت عملی مرتب کرکے تین دن میں پیش کریں۔
وزیر اعظم نے ہدایت کی کہ مالی وجوہات کی وجہ سے بھی مریض کو علاج سے محروم نہ رکھا جائے، صحت کی معیاری سہولیات کے حصول میں ملک کے غریب افراد کو مسائل ہیں، انہیں عالمی معیار کی سہولیات کی مفت فراہمی حکومت کی اولین ترجیحات میں شامل ہے۔
وزیر اعظم نے نادار اور مفلس طبقے کو عدم توجہ دینے کی سوچ کو بدلنے اور ان کی خدمت کو ترجیحات میں سر فہرست رکھنے کی ضرورت پر زور دیا۔ وزیراعظم نے پی کے ایل آئی کو ٹرسٹ بنانے کی ہدایت کرتے ہوئے کہا کہ نرسنگ یونیورسٹی کے منصوبے کو جلد مکمل کیا جائے اور پی کے ایل آئی کی صفائی کو بین الاقوامی معیار کے مطابق بنانے کے لئے اگر ضرورت پیش آئے تو صفائی کے نظام کو آوٹ سورس کردیا جائے۔
اجلاس میں خواجہ سلمان رفیق، خواجہ عمران نذیر، چیف سیکرٹری پنجاب، پنجاب کے ہیلتھ سیکر ٹری، متعلقہ اعلی حکام اور پی کے ایل آئی کے عہدیداران نے شرکت کی۔
