صدر مملکت ڈاکٹر عارف علوی نے پوری قوم کو عیدالفطر کی مبارکباد دیتے ہوئے کہا ہے کہ یہ دن خوشیاں بانٹنے اور اپنے معاشرے کے محروم طبقے کے لیے ایثاروقربانی کا دن ہے۔اس دن کا تقاضا ہے کہ ہم ضرورت مندوں، ناداروں، غریبوں اور محتاجوں کی بھرپور مدد کرتے ہوئے انہیں بھی عید کی خوشیوں میں شامل ہونے کا موقع فراہم کریں۔
اسلام آباد – (اے پی پی): صدر مملکت نے کہاکہ میں عید الفطر کے پر مسرت موقع پر پوری قوم کو مبارکباد پیش کرتا ہوں اور اللہ تعالی سے دعا گوہوں کہ وہ اس مبارک دن کو تمام پاکستانیوں اور عالم اسلام کے لیے خوشیوں اور آسانیوں کا سبب بنائے۔ آمین۔ انہوں نے کہاکہ اللہ تعالی کا بے پایاں کرم ہے کہ اس نے ہمیں بھرپور طریقے سے رمضان المبارک میں اجتماعی عبادت کرنے کا موقع اور توفیق عطا فرمائی اور آج عید الفطر کے پرمسرت لمحات میں ہم اس توفیق پر اللہ تعالی کا شکر بجالا رہے ہیں اور خوشی ومسرت کا اظہار کررہے ہیں۔ صدر مملکت نے کہاکہ رمضان المبارک کا مہینہ مسلمانوں کی روحانی اور اخلاقی تربیت کا مہینہ ہے ۔
یہ مہینہ اعلی انسانی صفات اور روحانی پاکیزگی حاصل کرنے کا ذریعہ ہے۔ روزہ ہمارے اندر صبر، تحمل، برداشت اور تقوی جیسی اعلی صفات پیدا کرتا ہے۔یہ ہمارے اندر دوسرے انسانوں کی خیرخواہی اور فلاح وبہبودکا جذبہ ابھارتا ہے اور اپنی ذات سے بالا ہو کر سوچنے کی ترغیب دیتا ہے۔ عید الفطر کا دن اللہ سبحانہ وتعالی کی طرف سے بخشش، رحمت اور عفو ودرگذر کا دن ہے۔ انہوں نے کہاکہ یہ دن خوشیاں بانٹنے اور اپنے معاشرے کے محروم طبقے کے لیے ایثاروقربانی کا دن ہے۔اس دن کا تقاضا ہے کہ ہم ضرورت مندوں، ناداروں، غریبوں اور محتاجوں کی بھرپور مدد کرتے ہوئے انہیں بھی عید کی خوشیوں میں شامل ہونے کا موقع فراہم کریں کیونکہ عید کی حقیقی خوشی تب ہی مل سکتی ہے جب ہم دوسروں کو بھی اپنی خوشی میں شریک کریں۔
صدر مملکت نے کہاکہ آئیے آج اس پرمسرت موقع پر ہم عہد کریں اور اللہ تعالی کے حضور دعا کریں کہ عبادت کا جو شوق، ضبطِ نفس کی جو خوبی اور ایثار وقربانی کا جو عملی مظاہرہ ہم نے رمضان المبارک میں کیا وہ ہماری شخصیت اور کردار کا حصہ بن جائے اور ہمیں نہ صرف اپنی ذات بلکہ ملک وقوم کی فلاح وترقی کا سبب بنائے اور ملکی سالمیت و استحکام کے لیے اپنا کردار ادا کرنے کی توفیق عطا فرمائے۔ آمین
