مسلم لیگ کے اہم رہنماء نے نواز شریف کی تاحیات نااہلی کے خاتمے کا عندیہ دیا ہے۔

حافظ آباد میں میڈیا سے گفتگو کرتے ہوئے وفاقی وزیر قانون اعظم نذیر تارڑ نے کہا کہ نواز شریف کی تاحیات نااہلی کا معاملہ جلد حل ہو جائے گا۔

انہوں نے کہا کہ مسجد نبویﷺ میں پیش آنے والا واقعہ قابل افسوس ہے، واقعے کے مقدمات ریاست پاکستان کی طرف سے درج نہیں کئے گئے، وزارت قانون اس سارے واقعہ کا جائزہ لے رہی ہے۔

اعظم نذیر تارڑ نے کہا کہ عمران خان کو لانگ مارچ سے قبل اپنی غلطیوں اور کوتاہیوں پر نظر ڈالنی چاہیے۔ انہوں نے کہا کہ بعض لوگ آئین سے زیادہ اپنے پارٹی لیڈر کو اہمیت دے رہے ہیں۔

اعظم تارڑ کا کہنا تھا کہ پی ٹی آئی کی حکومت کو آئینی طریقے سے ختم کیا گیا، پی ٹی آئی حکومت کے کرپشن کے اسکینڈل سامنے آرہے ہیں۔

یاد رہے کہ رواں برس سپریم کورٹ بار کے صدر کی جانب سے بھی سپریم کورٹ میں تاحیات نااہلی کی خاتمے اور نااہلی کی مدت طے کرنے کیلئے درخواست دائر کی گئی تھی۔