مسلم لیگ (ق) کے رہنماؤں چوہدری شجاعت حسین اور چوہدری پرویز الٰہی نے ساتھ بیٹھ کر خاندانی اختلافات کی خبروں کی تردید کردی ہے۔
گجرات میں تقریب سے خطاب کرتے ہوئے سربراہ ق لیگ چوہدری شجاعت حسین نے کہا کہ ہمارے خاندان میں اختلافات کی افواہیں پھیلائی جارہی ہیں، ایسی باتیں کرنے والوں کو اللہ ہدایت دے۔
انہوں نے کہا کہ ہمارے خاندان میں سیاسی طور پر بگاڑاور اختلافات پیداکرنےکی کوشش کرنے والے ناکام ہوں گے، اور منہ کی کھائیں گے، جو ہمیں ورغلانے کی کوشش کررہے ہیں وہ نقصان اٹھائیں گے۔
چوہدری شجاعت کا کہنا تھا کہ سیاستدان باہمی اختلافات بھلاکرعام آدمی کےمسائل حل کرنےکوترجیح دیں، ہم ظالموں کاساتھ نہیں دیں گے، ہم سےجوبھی غلطی ہوگی اس کاازالہ کریں گے۔ مزید کہا کہ سیاست میں گالی گلوچ کے کلچر کو ختم کرنا چاہیے، مہنگائی بڑھ رہی ہے، قیمتیں بڑھانے والے عناصرکی نشاندہی کرناہوگی۔
اس موقع پر اسپیکر پنجاب اسمبلی چوہدری پرویز الٰہی نے تقریب سے خطاب کرتے ہوئے کہا کہ جن عہدوں اور وزارتوں میں عزت نہ ہوان کے قریب نہیں جاناچاہیے، گھروں میں اختلافات معمول کاحصہ ہیں، ہم پہلے بھی ایک تھےاورآج بھی اکٹھےہیں۔
انہوں نے کہا کہ عمران خان پاکستانی عوام کیلئے درد دل رکھنے والے ہیں، وہ عوام کی بہتری اور دین کےفروغ پریقین رکھتے ہیں۔
