پاکستان تحریک انصاف کی جانب سے توہین مذہب کے مقدمات پر اقوام متحدہ کے مختلف اداروں کو لکھے گئے خطوط پر ن لیگ کا ردعمل سامنے آیا ہے۔

اسلام آباد –  (اے پی پی): وزیر مملکت توانائی سینیٹر ڈاکٹر مصدق ملک نے ڈاکٹر شیریں مزاری کے اقوام متحدہ کے خصوصی مندوب کو لکھے خطوط کو ہمیں بچاؤ اپیل  قرار دیا ہے۔ اس حوالے سے ردعمل دیتے ہوئے ڈاکٹر مصدق ملک نے کہا کہ یہ خطوط نہیں یہ ہمیں بچاؤ کی اپیل اور دہائی ہے ۔

وزیر مملکت کا کہنا تھا  کہ ایک طرف تحریک انصاف امریکہ پر بیرون ملک سازش کی بات کر رہی ہے اور دوسری طرف اقوام متحدہ کو رحم کی اپیل کررہی ہے۔ انہوں نے استفسار کیا کہ یہ کیسی سازش ہے؟

 انہوں نے کہا کہ ایک طرف آزادی کے دعوے کرتے ہیں اور دوسری جانب سیاست چمکانے کے لئے بیرون ملک خط لکھ رہے ہیں۔ انہوں نے کہا کہ دوسروں پر فتوے باندھنے والی پی ٹی آئی لیڈر کس منہ سے اقوام متحدہ کو عرضیاں لکھ رہی ہیں؟