وزیراعظم محمد شہباز شریف نے صدر ڈاکٹر عارف علوی، وزیراعظم آزاد کشمیر سردار تنویر الیاس، سابق صدر آصف علی زرداری سمیت تمام اتحادی جماعتوں کے قائدین اور وزرا اعلیٰ کو ٹیلیفون پر عیدالفطر کی مبارکباد دی ہے۔
اسلام آباد – (اے پی پی): وزیراعظم آفس کے میڈیا ونگ سے جاری بیان کے مطابق وزیراعظم محمد شہباز شریف نے صدر ڈاکٹر عارف علوی کو ٹیلی فون کیا انھیں عیدالفطر کی مبارکباد دی اور نیک تمناؤں کا اظہار کیا۔
وزیراعظم شہباز شریف نے آزاد جموں و کشمیر کے وزیر اعظم سردار تنویر الیاس کو ٹیلی فون کیا اور اہل جموں وکشمیرکو عید کی مبارکباد دی۔ وزیراعظم نے مقبوضہ جموں و کشمیر کے عوام پر نماز عید کے اجتماعات پر پابندیوں کی مذمت کی ۔ انہوں نے کشمیریوں کو حق استصواب رائے ملنے تک بھرپور سیاسی، اخلاقی اور سفارتی حمایت جاری رکھنے کے عزم کا اظہار کیا۔ وزیراعظم شہباز شریف نے ٹیلیفون پر سندھ، خیبرپختونخوا، گلگت بلتستان کے وزرا اعلی اور قائم مقام گورنر بلوچستان کو بھی عید کی مبارکباد دی۔ انہوں نے وزیراعلیٰ سندھ سید مراد علی شاہ او ر وزیر اعلیٰ بلوچستان کو ٹیلیفون کیا ۔
وزیر اعلیٰ بلوچستان کے بیرون ملک دورے پر ہونے کی وجہ سے وزیراعظم کی ان سے بات نہ ہوسکی۔ وزیراعظم شہباز شریف نے تمام اتحادی جماعتوں کے قائدین، وزرائے اعلیٰ کو ٹیلی فون پر عید کی مبارکباد دی اور نیک تمناؤں کا اظہار کیا۔ وزیراعظم نے سابق صدر آصف علی زرداری اور پاکستان پیپلز پارٹی کے چیئرمین اور وزیر خارجہ بلاول بھٹو زرداری کو فون کیا اور عید کی مبارکباد دی ۔ سابق صدر آصف زرداری اور بلاول بھٹو نے وزیراعظم کو مبارکباد دی اور ٹیلیفون کرنے پر شکریہ ادا کیا ۔ وزیراعظم شہباز شریف نے پی ڈی ایم کے سربراہ مولانا فضل الرحمان سے بھی فون پر گفتگو کی ، عید کی مبارکباد دی اور ملکی صورتحال پر تبادلہ خیال کیا ۔ مولانا فضل الرحمان نے سعودی عرب اور متحدہ عرب امارات کے کامیاب دوروں پر وزیراعظم کو مبارکباد دی ۔
وزیراعظم نے امیر جماعت اسلامی سراج الحق کو ٹیلیفون کیا اور انہیں عیدالفطر کی مبارکباد دی، دونوں رہنماؤں نے ملکی سیاسی صورتحال پر بھی تبادلہ خیال کیا ۔ وزیراعظم نے وفاقی وزیر مواصلات مولانا اسعد محمود، محسن داوڑ، خالد مقبول صدیقی، سردار اختر مینگل، علامہ ساجد میر اور خالد مگسی سے بھی ٹیلیفون پر گفتگو کی ، عید کی مبارکباد دی ۔ وزیراعظم شہباز شریف نے محمود خان اچکزئی، علی نواز شاہ، شاہ زین بگٹی، اسلم بھوتانی، چوہدری سالک حسین سے بھی فون پر بات کی اور عید کی مبارکباد دی۔ وزیراعظم نے چوہدری سالک حسین سے چوہدری شجاعت حسین کی مزاج پرسی کی اور نیک تمناؤں کا اظہار کیا۔
