قومی کرکٹ ٹیم  کے سابق کپتان شاہد آفریدی نے سوشل میڈیا پر خود پر ہونے والی تنقید کا جواب دیتے ہوئے کہا  ہے کہ بطور  کرکٹ ٹیم کے کپتان انہوں نے ہمیشہ عمران خان کی تعریف کی لیکن بطور وزیر اعظم ان کی پالیسیوں سے اختلاف کرنا میرا حق ہے۔

اپنے ویڈیو پیغام میں شاہد آفریدی کا کہنا تھا کہ  اختلاف رائے کا احترام کرنا مہذب معاشرے کی نشانی ہے،شہباز شریف کو  جب وزیر اعظم بننے کی مبارکباددی تو جانتا تھا کہ مجھ پر تنقید ہوگی۔ انہوں نے اپیل کی کہ ایک دوسرے سے اختلافات رکھیں لیکن اسے نفرت میں نہیں بدلنا چاہیے۔

انہوں نے کہا عمران خان ہمیشہ  سےمیرے آئیڈیل رہے ہیں، ان کو دیکھ کر کرکٹ شروع کی، 1992ء کاورلڈ کپ ہماری یادیں ہیں۔

شاہد آفریدی نے کہا کہ میں نے کبھی عمران خان کی ذات پر تنقید نہیں کی، ان کی پالیسیوں  سے اختلاف رکھنے کا مجھے حق ہے، میں نے ان پر  سیاسی باتوں کی وجہ سے تنقید نہیں کی، عام پاکستانی کے طور پر خیالات کا اظہار کیا۔

شاہد آفریدی کا کہنا تھا کہ  جو بھی سربراہ ہو، وہ قابل احترام ہے کیونکہ وہ ملک کی نمائندگی کرتا ہے،  ہم اگر ملک کی عزت چاہتے ہیں تو حکومت وقت کی عزت کریں۔