پاکستان پیپلزپارٹی نے پنجاب کیلئےنیا پاور شیئرنگ فارمولا تیار کیا ہے جس کے تحت پنجاب میں چار وزارتیں اور چیئرمین سینیٹ کا عہدہ پیپلز پارٹی کو ملے گا، جبکہ گورنر پنجاب کا عہدہ مسلم لیگ ن کو دیا جائے گا۔
پیپلزپارٹی کا وفد آج وزیر اعلیٰ پنجاب حمزہ شہباز سے ملاقات کر کے اپنی تجاویز پیش کرے گا۔
گزشتہ روز پیپلزپارٹی کے سینئر وائس چیئرمین اور سابق وزیر اعظم سید یوسف رضا گیلانی کے گھر پارٹی کے سینئر رہنماؤں کو عشائیہ دیا گیا جس میں اسپیکر قومی اسمبلی راجہ پرویز اشرف، مخدوم احمد محمود، مخدوم حسن محمود، قمر زمان کائرہ، حسن مرتضیٰ شریک ہوئے، اس موقع پر پاور شیئرنگ فارمولے پر بھی تبادلہ خیال کیا گیا۔
ذرائع کے مطابق پیپلزپارٹی پنجاب کابینہ میں چار وزارتیں لے گی، سینئر وزیر کیلئے حسن مرتضیٰ اور دیگر تین وزیروں کیلئے علی حیدر گیلانی، ممتاز چانگ اور مخدوم عثمان محمود کے نام فائنل کئے گئے، چیئرمین سینیٹ کیلئے سید یوسف رضا گیلانی کا نام تجویز کیا گیا، جبکہ پنجاب میں گورنر کا عہدہ مسلم لیگ ن کو دینے کا فیصلہ کر لیا گیا۔
