سابق وزیر اطلاعات فواد چوہدری نے 20 مئی تک حکومت ختم ہونے کی پیش گوئی کرتے ہوئے کہا  ہے کہ ہماری اطلاعات کے مطابق  تین ساتھی شہباز شریف کا ساتھ چھوڑ رہے ہیں۔

اسلام آباد میں پریس کانفرنس کرتے ہوئے فواد چوہدری نے کہا کہ سال کے آخر میں گندم کی خریداری نہ ہونے سے آٹے کا بحران پیدا ہوجائے گا،  صرف پیپلز پارٹی کو راضی کرنے کیلئے پنجاب کا پانی سندھ کو دیا جارہا ہے۔

انہوں نے کہا کہ چیف سیکریٹری اور آئی جی اپنی من مانی کر رہے ہیں، چیف سیکریٹری اور  آئی جی کو سمجھ نہیں آرہا کس کی بات سننی ہے، انتظامی فیصلے کرنے کیلئے پنجاب میں حکومت ہی نہیں، پنجاب کے انتظامی بحران پر فوری ایکشن کی ضرورت ہے۔

رہنماء پی ٹی آئی  کا کہنا تھا کہ ہماری اطلاعات کے مطابق  حکومت کے 3 ساتھی شہباز شریف کا مزید ساتھ دینے سے انکاری ہیں، 20 مئی تک یہ حکومت ختم ہو جائے گی۔

فواد چوہدری کا کہنا تھا کہ سپریم کورٹ نے 9 مئی  کو آرٹیکل 63 اے کیس کی سماعت رکھی ہے، جتنی جلدی آرٹیکل 63 اے پر فیصلہ آئے گا اتنا جلدی استحکام ہوگا۔

رہنماء پی ٹی آئی  کا کہنا تھا کہ اقتدار اعلیٰ کا فیصلہ عوام کو کرنا ہے، یہ حکومت 20 مئی سے پہلے فارغ ہو جائے گی، الیکشن کمشنر  اگرتین ماہ میں الیکشن نہیں کروا سکتے تو استعفیٰ دے دیں۔