پاک بھارت آبی تنازعات پر نئی دہلی کی روائتی ہٹ دھرمی برقرار ہے، اسلام آباد کی جانب سے بھیجے گئے خط کا ایک ماہ بعد بھی جواب نہیں دیاگیا۔

ذرائع انڈس واٹر کمیشن کے مطابق بھارت کی روائتی  ہٹ دھرمی کے باعث پہلے سے طے شدہ  مئی میں نئی دہلی میں ہونے والے آبی مذاکرات تاخیر کا شکار ہونے کا خدشہ پیدا ہوگیا ہے۔

ذرائع کا کہنا ہے کہ پاکستان بھارت آبی ماہرین کا 3 روزہ اجلاس یکم مارچ کو اسلام آباد میں ہوا تھا، شیڈول کے مطابق پاکستان بھارت آبی ماہرین کا آئندہ کا اجلاس مئی میں نئی دہلی میں ہونا ہے۔

ذرائع کے مطابق اسلام آباد میں ہونے والے اجلاس میں آئندہ نئی دہلی میں مذاکرات پر اتفاق رائے ہوا تھا،پاکستانی حکام کا کہنا ہے کہ  انڈس واٹر کمشنر اجلاس کیلئےبھارتی ہم منصب کو جلد دوسرا خط لکھیں گے۔

ذرائع انڈس واٹر کمیشن کے مطابق پاکستان کو مقبوضہ کشمیر میں دریائے چناب پر بنائے جانے والے منصوبوں پر اعتراض ہے، جبکہ  بھارت دریائے سندھ پر بھی غیرقانونی آبی منصوبے شروع کرنےکی منظوری دے چکا ہے۔

بھارت کی جانب سےآبی منصوبوں کی تعمیر سے پاکستانی دریاؤں میں پانی کا بہاؤ کم ہوگا۔