وزیر خارجہ بلاول بھٹو زرداری نے چین کے سٹیٹ کونسلر اور وزیر خارجہ وانگ یی سے بدھ کے روز ورچوئل ملاقات کی۔
دفتر خارجہ کی جانب سے جاری بیان کے مطابق سٹیٹ کونسلر وانگ یی نے وزیر خارجہ کو عہدہ سنبھالنے پر مبارکباد دی۔ دونوں وزرائے خارجہ نے باہمی دلچسپی کے دوطرفہ، علاقائی اور عالمی امور پر تبادلہ خیال کیا۔ وزیر خارجہ نے پاکستان اور چین کے درمیان تزویراتی تعاون پر مبنی شراکت داری کو مضبوط بنانے کے لیے دونوں فریقوں کے اقدامات کو سراہا۔
وزیر خارجہ نے پاکستان کی خودمختاری، علاقائی سالمیت، آزادی اور قومی ترقی کے لیے چین کی بھرپور حمایت پر اپنے چینی ہم منصب کا شکریہ ادا کیا۔ وزیر خارجہ نے دوطرفہ اسٹریٹجک تعاون پر مبنی شراکت داری میں نئی رفتار پیدا کرنے اور عملی تعاون کی نئی راہیں شامل کرنے کے عزم کا اظہار کیا۔ وزیر خارجہ نے پاکستان کے بنیادی ڈھانچے، توانائی، صنعت کاری، سماجی و اقتصادی ترقی اور لوگوں کی زندگیوں میں بہتری لانے کے لئے سی پیک کے تبدیلی کے اثرات کو سراہا۔
Honored to hold my first bilateral meeting with Chinese State Councilor & Foreign Minister Wang Yi virtually today. China-Pakistan all weather friendship has stood the test of time. National Unity Govt attaches the top most importance to enhancing this partnership even further. pic.twitter.com/Cde3SvYXEI
— BilawalBhuttoZardari (@BBhuttoZardari) May 11, 2022
انہوں نے اس بات پر زور دیا کہ پاکستان سی پیک کی اعلیٰ معیار کی ترقی کے لیے پرعزم ہے اور کلیدی منصوبوں کو تیزی سے آگے بڑھانے، خصوصی اقتصادی زونز کے قیام اور پاکستان میں صنعتی منتقلی کو تیز کرنے کا منتظر ہے۔ انہوں نے کراچی یونیورسٹی میں دہشت گردی کے حملے کی مذمت کی جس میں تین چینی اساتذہ کی جانیں گئیں، وزیر خارجہ نے مجرموں کو پکڑنے اور انصاف کے کٹہرے میں لانے کے پاکستان کے پختہ عزم پر زور دیا۔ انہوں نے اس بات کا اعادہ کیا کہ پاکستان ملک میں چینی منصوبوں، شہریوں اور اداروں کی حفاظت کو انتہائی اہمیت دیتا ہے۔
دونوں وزرائے خارجہ نے خطے اور اس سے باہر کی بدلتی ہوئی صورتحال بالخصوص افغانستان کی سنگین انسانی اور اقتصادی صورتحال پر بھی تبادلہ خیال کیا۔ وزیر خارجہ نے چینی ہم منصب کو بھارت کے غیر قانونی طور پر زیر قبضہ جموں و کشمیر میں انسانی حقوق کی سنگین خلاف ورزیوں سے بھی آگاہ کیا۔ وزیر خارجہ بلاول بھٹو زرداری اور سٹیٹ کونسلر اور وزیر خارجہ وانگ یی نے قریبی رابطے میں رہنے پر اتفاق کیا۔