ایم کیو ایم کے پی ٹی آئی حکومت سے علیحدگی پر طے ہونے والے معاہدے پر عملدر آمد شروع ہوگیا، جس کے بعد پیپلز پارٹی نے ایم کیو ایم کو سندھ کابینہ میں شمولیت کی دعوت دے دی ہے۔
تفصیلات کے مطابق پاکستان پیپلز پارٹی کا وفد ایم کیو ایم کے دفتر پہنچا۔ ملاقات میں بلدیاتی ڈرافٹ پر بھی تبادلہ خیال کیا گیا۔
ایم کیو ایم کے عارضی مرکز پر ہونے والی ملاقات میں پیپلز پارٹی کے ناصر حسین شاہ اور سعید غنی شامل تھے، جبکہ ایم کیو ایم کی طرف سے کنوینر خالد مقبول صدیقی، ڈپٹی کنوینر عامر خان اور دیگر رہنما شریک ہوئے۔ ملاقات کے دوران پیپلز پارٹی میونسپل فنکشن کونسلرز کو دینے اور صوبائی مالیاتی کمیشن پر عملدرآمد کرنے پر آمادہ ہوگئی۔ علاوہ ازیں ایم کیو ایم کو سندھ کابینہ میں دو وزارتوں کی پیشکش بھی کی گئی۔
ملاقات کے بعد میڈیا سے گفتگو کرتے ہوئے ناصر حسین شاہ نے بتایا کہ سندھ کے وسیع تر مفاد میں ایم کیوایم کے ساتھ مل کر کام کرنے پر اتفاق ہوا ہے۔اس موقع پر رہنما ایم کیو ایم کنور نوید کا کہنا تھا کہ پیپلز پارٹی کے وفد سے کراچی اور حیدر آباد کی ترقی پر گفتگو ہوئی، ہماری کوشش ہے کہ معاہدے کے مطابق قانون سازی ہوجائے۔معاہدے پر عملدرآمد کے بعد صوبائی حکومت کے معاملے پر غور کریں گے۔
ملاقات میں فیصلہ کیا گیا کہ ایم کیو ایم کا وفد جلد آصف زرداری اور بلاول بھٹو سے ملاقات کرے گا۔
