چیئرمین پی ٹی آئی اور سابق وزیر اعظم عمران خان کی فول پروف سیکیورٹی کے لئے ڈاکٹر شہباز گل نے سیکرٹری داخلہ کو خط لکھ دیا ہے۔

تفصیلات کے مطابق پی ٹی آئی کے رہنما ڈاکٹر شہباز گل نے کہا کہ حیران ہوں کہ متعلقہ سیکشن افسر سیکیورٹی انتظامات کے لیے پوچھ رہا ہے، دوسری جانب ایک ضمانت پر مجرم خاتون کو ملٹی لئیر سیکیورٹی حصار فراہم کیے جارہے ہیں۔

ان کا کہنا تھا کہ تحقیقاتی ادارے نے اس خاتون کی ضمانت منسوخی کی درخواست بھی دی ہوئی ہے، یہ خاتون نہ تو بلیو بک کا حصہ ہے نہ ہی حکومتی رولز آف بزنس کے تحت سیکیورٹی کی حق دار ہے۔انہوں نے کہا کہ وزارت کا سیکیورٹی فراہم کرنے کے بجائے حفاظتی حصار کے انتظام کی ہدایت دینا حیران کن ہے، یاد رہے اس وقت پی ٹی آئی اپنے وسائل سے عمران خان کو سیکیورٹی دے رہی ہے۔

ڈاکٹر شہباز گل کا مزید کہنا تھا کہ حکومت کی جانب سے سیکیورٹی کے انتہائی محدود اقدامات کیے گئے ہیں، وزارت کا افسر باتیں کرنے کے بجائے فول پروف سیکیورٹی کا پلان شیئر کرے۔