سندھ میں دریائے گاج پر بننے والا گاج ڈیم 7 سال  کی طویل مدت کے بعد بھی مکمل نہ ہوسکا۔

تفصیلات کے مطابق قومی اسمبلی اجلاس میں وزارت آبی وسائل نے بتایا کہ ناکافی فنڈز کے باعث سال 2015ء میں گاج ڈیم مکمل نہیں ہوسکا۔

اجلاس میں بتایا گیا کہ فنڈز میں کمی کے باعث گاج ڈیم کی تکمیل کی  مدت 2018ء تک بڑھا دی گئی، تاہم معاہدہ ٹھیکیدار کی غفلت کے باعث 28 ستمبر 2018ء کو ختم کردیا گیا۔

قومی اسمبلی میں وزارت آبی وسائل نے جواب دیا کہ سندھ میں سال 2015ء میں مکمل ہونے والا گاج ڈیم اب 2024ء میں مکمل ہوگا۔

وزارت آبی وسائل نے مزید بتایا کہ گاج ڈیم کا تعمیراتی کام دوبارہ شروع کردیا گیا ہے، جس کیلئے 46  ہزار 989 ملین روپے کی مختص کی گئی ہے۔

جواب میں یہ بھی بتایا گیا کہ گاج ڈیم کا 40 فیصد کام مکمل ہوگیا ہے، سال 2023-24ء تک مطلوبہ فنڈز ملے تو گاج ڈیم 2024ء میں مکمل ہوجائے گا۔