وفاقی وزیرخزانہ ومحصولات مفتاح اسماعیل نے کہاہے کہ حکومت ورثے میں ملنے والے معاشی چیلنجوں پر قابو پانے کیلئے اقدامات کررہی ہے اوراس حوالہ سے مختلف ڈھانچہ جاتی اصلاحات پرکام ہورہاہے۔
اسلام آباد – (اے پی پی): ایشیائی ترقیاتی بینک کے ایگزیکٹوڈائریکٹرز ڈاکٹروان فاریسان بن وان سلیمان اورنوراحمدسے ملاقات میں گفتگو کرتے ہوئے وزیر خزانہ نے بینک کے ایگزیکٹو ڈائریکٹرز کا خیرمقدم کرتے ہوئے وزیر خزانہ مفتاح اسماعیل نے کہا کہ اصلاحات کے ایجنڈے پر عمل پیرا ہونے اور ملک میں مختلف ترقیاتی منصوبوں کو آگے بڑھانے میں ایشیائی ترقیاتی بینک نے ہمیشہ پاکستان کے ساتھ معاونت کی ہے۔ انہوں نے توانائی، تعلیم، مالیات ،قرض کے انتظام اور سماجی و اقتصادی ترقی سمیت ترجیحی شعبوں میں اہم اصلاحات لانے کے لیے ایک بڑے ترقیاتی شراکت دارکے طور پر ایشیائی ترقیاتی بینک کی دیرینہ شراکت داری اور پختہ عزم کوبھی سراہا۔
وزیر خزانہ نے حکومت کو ورثے میں ملنے والے معاشی چیلنجوں کا جائزہ پیش کیا اور بتایا کہ موجودہ حکومت معیشت کو جامع اور پائیدار ترقی کی راہ پر واپس لانے کے لیے مختلف ڈھانچہ جاتی اصلاحات پرکام کرہی ہے انہوں نے اس اعتماد کا اظہارکیا کہ موجودہ حکومت اقتصادی چیلنجوں پر قابو پانے میں کامیاب ہوگی ۔ ایشیائی ترقیاتی بینک کے ایگزیکٹوڈائریکٹرز ڈاکٹروان فاریسان بن وان سلیمان اورنوراحمد نے کہاکہ بینک پاکستان میں بنیادی ڈھانچہ اورسماجی اور مالیاتی شعبوں میں اصلاحات کے ایجنڈے کے لیے تعاون فراہم کرنے میں پرعزم ہے۔
انہوں نے اصلاحات کے پروگراموں کو تقویت دینے اور ملک کے ترقیاتی ایجنڈے بشمول مالیاتی انتظام، پائیداریت، مسابقت کو بڑھانے اور نجی شعبے کی ترقی کے لیے تعاون جاری رکھنے کے لیے بینک کے عزم کا اعادہ کیا۔ وزیر خزانہ نے مہمانوں اور اے ڈی بی کی ٹیم کا ان کی مسلسل حمایت پر شکریہ ادا کیا ۔ وزیرخزانہ نے حکومت پاکستان کی جانب سے جاری پروگراموں پر تیزی سے عمل درآمد کرنے کے پختہ عزم کا یقین دلایا۔
