صدر مملکت ڈاکٹر عارف علوی نے کہا ہے کہ وزیر اعظم گورنر پنجاب کی تقرری کے بارے میں اپنی ایڈوئس پر نظر ثانی کریں۔
تفصیلات کے مطابق صدر مملکت نے اپنے جاری کردہ ایک بیان میں کہا کہ گورنر پنجاب عمر سرفراز چیمہ اب بھی گورنر کے عہدے پر فائز ہیں، نئی تقرری کا کوئی جواز نہیں۔انہوں نے کہا کہ آئین کے آرٹیکل 101 (2) کے تحت گورنر صدر کی خوشنودی تک عہدے پر فائز رہے گا، موجودہ ملکی حالات کا تقاضا ہے کہ موجودہ گورنر اپنے عہدے پر برقرار رہیں۔
ان کا کہنا تھا کہ گورنر پنجاب کے خط اور رپورٹ کے مطابق وزیر اعلیٰ کے انتخاب میں اراکین ِپنجاب اسمبلی کی وفاداریاں بدلی گئی، پنجاب میں غیر قانونی طریقے سے اکثریت حاصل کر کے آئین کے آرٹیکل 63 اے کی خلاف ورزی کی گئی۔صدر مملکت نے کہا کہ غیر قانونی اقدامات سے پنجاب میں گورننس کے سنگین مسائل پیدا ہوئے، صدارتی ریفرنس پر سپریم کورٹ کے 17 مئی کے فیصلے سے گورنر کے اصولی موقف کی توثیق ہوئی۔
انہوں نے کہا کہ الیکشن کمیشن کے 20 مئی کے فیصلے سے بھی گورنر پنجاب کا موقف مزید مستحکم ہوا، الیکشن کمیشن نے 25 اراکین صوبائی اسمبلی کے انحراف ، وفاداریاں بدلنے کی تصدیق کی۔ان کا کہنا تھا کہ الیکشن کمیشن نے وفاداریاں بدلنے کو ووٹر اور پارٹی کی پالیسی کو دھوکہ دینے کی بدترین شکل کہا، الیکشن کمیشن کے فیصلے کے مطابق منحرف ہونے والے 25 ایم پی اے پنجاب اسمبلی کے رکن نہیں رہے۔
صدر مملکت ڈاکٹر عارف علوی نے مزید کہا کہ وزیر اعظم آئین کے آرٹیکل 48 (1) کے مطابق نئے گورنر پنجاب کی تقرری کی ایڈوائس پر نظر ثانی کریں۔
