حریت رہنما یاسین ملک کی اہلیہ مشعال ملک نے یاسین ملک کے کیس کے فیصلے کے تناظر میں عمران خان سے لانگ مارچ آگے بڑھانے کی اپیل کی ہے۔
اسلام آباد میں پریس کانفرنس کے دوران مشعال ملک نے کہا کہ میں، میری بیٹی اور عوام 25 مئی کو یاسین ملک کے پیار میں نکل رہے ہیں۔انہوں نے عمران خان کو مخاطب کرتے ہوئے کہا کہ آپ تو یاسین ملک کے دوست ہیں، اپنا دھرنا آگے بڑھادیں گے تو کوئی فرق نہیں پڑے گا۔
یاسین ملک کی اہلیہ نے مزید کہا میں جانتی ہوں کہ اندرونی سیاست بہت ضروری ہے، مگر کشمیر عبادت ہے، آپ 25 تاریخ کے دن صرف کشمیر کیلئے اور یاسین ملک کیلئے نکلیں۔
انہوں نے کہا کہ یاسین ملک صرف کشمیر کا نہیں اس خطے کے امن اور آزادی کی علامت ہے، بھارتی عدالت انہیں اس دن یعنی 25 مئی کو قید یا موت کی سزا سنائے گی۔
مشعال ملک کا کہنا تھا کہ 8 سال ہوگئے ہیں میں نے اپنے شوہر کو نہیں دیکھا، آج یاسین ملک کی بیوی اور بیٹی اُس کیلئے تڑپ رہی ہیں، آپ لوگ اپنی اندرونی سیاست دو دن کے بعد کرلیں، اگر آپ کو دھرنے کی کال دینی ہی ہے تو کفن باندھ کر نکلیں، یاسین ملک کیلئے نکلیں۔
یاسین ملک کی اہلیہ کا کہنا تھا کہ میرے شوہر کو شہید نہ ہونے دیں، یہ میری بیٹی نہیں کشمیر کی بیٹی ہے، جو قربانی کشمیری دے رہے ہیں، اس سے روح کانپ جاتی ہے۔
