وفاقی وزیراطلاعات ونشریات مریم اورنگزیب نے کہا ہے کہ ہرآئینی طریقہ اپنائیں گے، لیکن خونی مارچ نہیں ہونے دیں گے۔

اپنے بیان میں مریم اورنگزیب کا کہنا تھا کہ پی ٹی آئی کے خونی لانگ مارچ کے متعلق اتحادی جماعتوں سے مشاورت کریں گے۔ انہوں نے کہا  کہ الیکشن کرانےکا اختیار اب ہمارا ہے، جومرضی کرلیں الیکشن تب ہوگا جب ہم چاہیں گے، ہرآئینی طریقہ اپنائیں گے، خونی مارچ نہیں ہونے دیں گے۔

وزیر اطلاعات نے کہا ہے کہ عمران صاحب کان کھول کر سن لیں، آپ چیخیں، پیٹیں، روئیں، دھمال ڈالیں، الیکشن کا فیصلہ حکومت اور اتحادیوں نے کرنا ہے، عمران نیازی کو اگر الیکشن چاہئے تھا تو اس وقت کرواتے جب وہ اقتدار سے چمٹے ہوئے تھے اور اختیار رکھتے تھے، الیکشن سے متعلق اب ان کا کوئی اختیار نہیں ہے۔

 انہوں نے کہا کہ چار سال ملک اور عوام کو لوٹنے والا 25 مئی کو پھر اسلام آباد لوٹ مار کے نئے ایجنڈے کے ساتھ آ رہا ہے۔ مریم اورنگزیب نے کہا کہ عمران نیازی چار سال کی ناکامیوں، نااہلیوں اور کرپشن پر معافی مانگنے اسلام آباد آ رہے ہیں۔

انہوں نے کہا کہ چار سال میں معیشت کا دھڑن تختہ اور مہنگائی سے عوام کو غریب کرنے والا، آٹا، چینی، دوائی، کھاد، چوری کرنے والا، ڈالر کو 115 سے 189 پر پہنچانے والا اور چار سالوں میں قرض کو 45 ہزار ارب روپے پر پہنچانے والا اسلام آباد کیا کرنے آ رہا ہے۔

انہوں نے کہا کہ عمران نیازی نے بدترین مہنگائی کر کے چار سال عوام کی چیخیں نکلوائیں، ایک کروڑ نوکری اور پچاس لاکھ گھر کے جھوٹے وعدے کئے، مہنگائی کو 16 فیصد تک پہنچایا، آج وہ کس منہ سے اسلام آباد آ رہے ہیں؟ انہوں نے کہا کہ 25 مئی کو آئی ایم ایف کے ساتھ مذاکرات کا آغاز ہے اور عمران خان کا لانگ مارچ کا اعلان اس پر نیا حملہ ہے۔