سابق وزیر خارجہ شاہ محمود قریشی نے کہا ہے کہ کل موصول ہونے والی کال کس کی تھی، میں یہ نہیں بتا سکتا، کال موصول ہونے والے معاملے پر خاموشی اختیار کروں گا۔
برطانوی نشریاتی ادارے سے گفتگو کرتے ہوئے شاہ محمود قریشی کاکہنا تھا کہ حقیقی آزادی مارچ میں شرکت کیلئے قوم کو دعوت دے رہے ہیں، یہ پوری قوم کیلئے ایک فیصلہ کن مرحلہ ہے۔
انہوں نے کہا کہ عمران خان نے کرپٹ عناصر پر ہاتھ ڈالا تو ان سے تعاون نہیں کیا گیا، ہمارا صرف صاف اور شفاف الیکشن کا ایجنڈا ہے۔
یاد رہے کہ عمران خان نے اپنی جماعت کے سینئر رہنماؤں کے ہمراہ اتوار کے روز پشاور میں اسلام آباد کی طرف لانگ مارچ کرنے کا اعلان کیا تھا۔
اس پریس کانفرنس سے کچھ دیر قبل عمران خان کے ساتھ بیٹھے شاہ محمود قریشی کو کسی کا فون آیا، جس پر عمران خان انہیں یہ فون کال سننے سے منع کرتے ہوئے کہا کہ فون بند کر دیں، مگر اس کے باوجود شاہ محمود قریشی نے کال ریسیو کی اور اس کے بعد عمران خان کے کان میں کہا کہ وہ پھر آپ کو ٹریپ کر دیں گے۔
یہ سن کر عمران خان نے جواب دیا کہ کر لیں، کر لیں۔
