پنجاب پولیس نے پی ٹی آئی کے لانگ مارچ سے قبل قیادت اور کارکنوں کیخلاف بڑے پیمانے پر کریک ڈاؤن شروع کردیا ہے۔
لاہور سمیت پنجاب کے مختلف شہروں میں پولیس نے گھروں اور تنظیمی دفاتر پر چھاپےمارتے ہوئے متعدد کارکنوں اور رہنماؤں کو گرفتار کرلیا ہے۔
تفصیلات کے مطابق پی ٹی آئی پنجاب کی صوبائی قیادت، رہنماؤں، مقامی اور علاقائی عہدیداران کو درجنوں کی تعداد میں حراست میں لے کر نامعلوم مقام پر منتقل کردیا ہے۔ پولیس نے پی ٹی آئی سے تعلق رکھنے والے سابق وزراء، ایم پی اے اور ایم این ایز کے گھروں پر بھی چھاپے مارے ہیں۔
ٹوئٹر پر اپنے بیان میں پاکستان تحریک انصاف کے رہنما اور سابق وفاقی وزیر ریونیو حماد اظہر نے کہا کہ پولیس مجھے گرفتار کرنے میرے گھر پہنچ گئی ہے۔
پنجاب پولیس نے ضلع راجن پور میں بھی تحریک انصاف کے کارکنوں کیخلاف کریک ڈاؤن کر دیاہے، راجن پور سے سینئر عہدیداران عابد سکھیرا، واجد سکھیرا اور عمران ستار رحمانی سمیت متعدد افراد گرفتار کرلیا گیا ہے، جبکہ روجھان سے بھی سابق تحصیل نائب صدر شیرلنگ مزاری سمیت متعدد کارکنان کو تحویل میں لیا گیا ہے۔
ذرائع کے مطابق پنجاب پولیس نے رہنما پی ٹی آئی عثمان ڈار کی رہائش گاہ پر بھی چھاپہ مارا، لیکن وہ گھر پر موجود نہیں تھے۔
علاوہ ازیں پی ٹی آئی اعجاز چوہدری کی لاہور میں واقع رہائش گاہ پر بھی پولیس کے چھاپے کی اطلاعات ہیں۔
