پارلیمنٹ کے مشترکہ اجلاس میں ایک قرارداد متفقہ طور پر منظور کی گئی ہے جس میں بھارت کے غیر قانونی زیر تسلط جموں و کشمیر میں حریت رہنما یاسین ملک کے خلاف سوچی سمجھی سازش کے تحت سیاسی مقدمہ چلانے کی مذمت کرتے ہوئے کہا گیا ہے کہ یہ کشمیری عوام کو اپنی حقیقی قیادت سے محروم کرنے کی بھارتی حکومت کی سازش ہے جو کہ اقوام متحدہ کے انسانی حقوق کے اعلامیے اور سول و سیاسی حقوق سے متعلق کنو نشن (آئی سی سی پی آر) کی کھلی خلاف ورزی ہے۔
جمعرات کو پارلیمنٹ کے مشترکہ اجلاس کے دوران وفاقی وزیر برائے انسانی حقوق ریاض حسین پیرزادہ نے قرارداد پیش کرنے کی تحریک پیش کی جسے ایوان نے منظور کر لیا۔ بعد ازاں تحریک پیش کرتے ہوئے ریاض حسین پیرزادہ نے کہا کہ یہ ایوان حریت رہنما یاسین ملک کے اہل خانہ کے ساتھ ہمدردی کا اظہار کرتا ہے، جن پر بھارت کے غیر قانونی زیر تسلط جموں و کشمیر میں سوچی سمجھی سازش کے تحت سیاسی مقدمہ چلایا جا رہا ہے۔
یہ ایوان بھارتی حکومت کی کشمیری عوام کو ان کی حقیقی قیادت سے محروم کرنے کی اس سازش کی بھرپور مذمت کرتا ہے جو کہ اقوام متحدہ کے انسانی حقوق کے اعلامیے اور سول و سیاسی حقوق سے متعلق کنو نشن (آئی سی سی پی آر) کی کھلی خلاف ورزی ہے۔ قرارداد میں کہا گیا کہ یہ ایوان زور دے کر کہتا ہے کہ کشمیریوں کی حق خود ارادیت کیلئے جدوجہد مقامی ہے جو کہ بھارتی حکومت کے کالے طاقت ور حربوں سے دبائی نہیں جا سکتی۔
قرارداد میں کہا گیا کہ یہ ایوان اس عزم کا اعادہ کرتا ہے کہ حکومت پاکستان فوری طور پر اقدامات اٹھائے اور عالمی برادری پر زور دیتا ہے کہ وہ بھارت کو بھارت کے غیر قانونی زیر تسلط جموں و کشمیر میں یاسین ملک سمیت تمام سیاسی رہنماؤں کے خلاف من گھڑت الزامات کو واپس لینے کیلئے مجبور کرے، ان کا تحفظ اور دیکھ بھال یقینی بنائی جائے، ان کی اہلیہ مشال ملک اور ان کی دس سالہ بیٹی سے ان کی ملاقات کرائی جائے، کشمیر میں انسانی حقوق کی خلاف ورزیاں بند کی جائیں، بہیمانہ فوجی محاصرہ ختم کیا جائے اور کشمیریوں کو اقوام متحدہ کی سلامتی کونسل کی متعلقہ قراردادوں اور ان کی خواہشات کے مطابق حق خود ارادیت دیا جائے۔ ایوان نے متفقہ طور پر قرارداد منظور کر لی۔
