ایران نے پاسداران انقلاب کی قدس فورس کے ایک اور کرنل  کی  غیر طبعی ہلاکت کی تصدیق کردی ہے۔

عرب نیوز کے مطابق ایران کی سرکاری خبر ایجنسی ارنا نے دعویٰ کیا ہے کہ قدس فورس کے کرنل علی اسماعیل زادے کی ہلاکت کچھ روز پہلے کراج شہر میں اپنے گھر میں پیش آنے والے حادثے کے باعث ہوئی تھی۔

میڈیا رپورٹس کے مطابق تہران کی جانب سے کرنل علی اسماعیل زادے کی ہلاکت کی مزید تفصیلات فراہم نہیں کی گئیں، تاہم میڈیا رپورٹس میں ان کے قتل کو خارج از امکان قرار دیا گیا ہے۔

دوسری جانب ایران کے ایک اور نشریاتی ادارے نے  دعویٰ کیا کہ کرنل اسماعیل زادے اپنے گھر کی چھت یا بالکونی سے گر کر ہلاک ہوئے ہیں۔

یاد  رہے کہ گزشتہ ماہ قدس فورس کے کرنل حسین سید خدائی کو تہران میں ان کے گھر کے باہر گولیاں مار کر قتل کردیا گیا تھا۔ کرنل علی اسماعیل زادے کی ہلاکت دو ہفتوں کے دوران قدس فورس میں دوسری بڑی غیر طبعی ہلاکت ہے۔