برطانیہ کے آرمی چیف نے فوجیوں کو میدان جنگ میں روس کا مقابلہ کرنے کیلئے تیار رہنے کا حکم دیا ہے۔

برطانوی جریدے کی رپورٹ  کے مطابق جنرل سر پیٹرک سینڈرزنے کہا کہ وہ 1941ء کے بعد سے پہلے چیف آف دی جنرل اسٹاف ہیں جنہوں نے یورپ میں ایک بڑی براعظمی طاقت پر مشتمل زمینی جنگ کے سائے میں فوج کی کمان سنبھالی ہے۔

انہوں نے کہا کہ روس کا یوکرین پر حملہ ہمارے بنیادی مقصد کی نشاندہی کرتا ہے، ہمیں  برطانیہ کی حفاظت اور زمین پر جنگ لڑنے اور جیتنے کیلئے  تیار رہنا ہے۔

جنرل سر پیٹرک نے نیٹو کے دائرہ کار کو وسعت دینے اور روس کو یورپ پر مزید قبضے سے روکنے کیلئے  برطانوی فوج کی نقل و حرکت اور اس میں جدت لانے کا اپنا ہدف بھی بتایا۔ انہوں نے کہا کہ ہم وہ نسل ہیں جو فوج کو یورپ میں ایک بار پھر لڑنےکیلئے تیار کرے گی۔

اس سے قبل نیٹو چیف اسٹولٹن برگ نے بھی یوکرین کا دورہ کیا اور کہا کہ روس یوکرین جنگ سالوں پر محیط ہوسکتی ہے۔ برطانوی وزیر اعظم اور نیٹو سربراہ نے   یوکرین کو اپنی بھرپور مدد کی یقین دہانی کرائی ہے۔