افغانستان کی وزارت صحت نے اسپتالوں کو فعال بنانےکیلئے حکومت پاکستان سے مدد کی درخواست کی پاکستان نے جان بچانے والی ادویات عطیہ کرنے کا اعلان کردیا ۔
تفصیلات کے مطابق افغانستان کے وزیر صحت ڈاکٹر قلندر پاکستان پہنچے ، جہاں انھوں نے حکومتی اور دیگر شخصیات سے ملاقاتیں کیں۔حکام کے مطابق افغان وزارت صحت نے اسپتالوں کو فعال بنانےکیلئے حکومت پاکستان سے مدد کی درخواست کی ہے جبکہ وزارت نے ہنگامی بنیادوں پرجان بچانے والی ادویات کی فراہمی کی بھی درخواست کی۔
پاکستانی حکام نے کہا کہ مریضوں کو پاک افغان بارڈرپرسہولیات کی بھی درخواست کی گئی ہے۔
افغان وزارت صحت نے اسپتالوں کوفعال بنانے کیلئے حکومت پاکستان سے درخواست کی ، ڈاکٹرقلندرجہاد نے کہا پاکستان افغان ٹیکنیشنز،نرسوں اور پیرا میڈیکل اسٹاف کو تربیت فراہم کرے۔
پاکستانی وزارت صحت کا کہنا تھا کہ افغانستان کی درخواست پر صحت کے شعبے میں مدد کریں گے، افغان عوام کو صحت کی سہولیات کیلئے جوائنٹ ورکنگ گروپ بنا لیا ہے۔پاکستانی حکام نے مزید کہا کہ افغان مریضوں کی سہولت کیلئےبارڈر پر ڈاکٹر زتعینات کر دیےگئے ، افغان وفد صحت کے شعبے میں مزید مدد حاصل کرنے کے لئے قطر روانہ ہوگیا ہے ،افغان ہیلتھ منسٹر وفد سمیت دو ہفتے بعد پھر پاکستان آئیں گے۔
دوسری جانب پاکستانی دوا ساز کمپنیوں نے افغانستان کو 10 کروڑ روپے کی ادویات عطیہ کرنے کا اعلان کیا۔پاکستان فارماسوٹیکل مینوفیکچررز ایسوسی ایشن کا کہنا ہے کہ افغانستان کو دو کنٹینر ادویات اور سرجری کے آلات ایک ہفتے میں بھجوا دیں گے۔
