وفاقی وزیر داخلہ شیخ رشید نے کہا ہے کہ پی ڈی ایم کا مہنگائی مارچ صرف کمپنی کی مشہوری کیلئے ہے، ابھی 4 ماہ باقی ہیں، ان سے 3 ماہ بعد بات کروں گا، امید ہے حکومت 4 ماہ تک مہنگائی کنٹرول کر لے گی۔
آج اسلام آباد میں پریس کانفرنس کرتے ہوئے وفاقی وزیر داخلہ شیخ رشید کا کہنا تھا کہ پی ڈی ایم نے احتجاج کیلئے 23 مارچ کا انتخاب کیا ہے، جو یوم پاکستان کے طورپر منایا جا تا ہے ، انہوں نے کہا کہ یوم پاکستان پریڈ کی تیاریوں اور سامان حرب کی نقل و حمل کیلئے 23 مارچ سے چند روز قبل ہی بعض راستے بند کرنا پڑتے ہیں اس لئے اپوزیشن لانگ مارچ کی تاریخ تبدیل کرے۔
انہوں نے کہا کہ قانون کے دائرے میں رہ کر جلسے جلوس سب کا حق ہے، ان کا مزید کہنا تھا کہ موجودہ مہنگائی کے پیچھے بہت سے عوامل کارفرما ہیں،امید ہے کہ حکومت چار ماہ تک مہنگائی کو کنٹرول کر لےگی۔
اسلام آباد :7 دسمبر
وفاقی وزیر داخلہ شیخ رشید احمد میڈیا سے گفتگو کرتے ہوئے.
( ایڈمن پوسٹ) https://t.co/Tc0IG0n2DJ@GovtofPakistan @PTVNewsOfficial @ImranKhanPTI pic.twitter.com/d4suBaM1rL— Sheikh Rashid Ahmed (@ShkhRasheed) December 7, 2021
سانحہ سیالکوٹ سے ملک کی بدنامی ہوئی
سانحہ سیالکوٹ کے متعلق گفتگو کرتے ہوئے وفاقی وزیر داخلہ کا کہنا تھا کہ ہم سب اس کی بھرپور مذمت کرتے ہیں، اس واقعہ سے ملک کی بدنامی ہوئی، واقعہ میں ملوث افراد کے خلاف قانونی کارروائی جاری ہے ۔ وزیر داخلہ نے کہا کہ ہمیں نہ صرف پولیس کے مورال کو سپورٹ کرنا ہے بلکہ ان طاقتوں اور میڈیا ہاؤسز کی بھی حوصلہ شکنی کرنا ہے جو انتہا پسندی کو ہوا دیتے ہیں۔ ساری قوم مل کر انتہا پسندی کاقلع قمع کرنے کا عہد کرے ۔ ان کا کہنا تھا کہ میڈیا ہاؤسز دہشت گردی اورانتہا پسندی میں ملوث لوگوں کی بات کو پیش نہ کریں تو یقین ہے کہ ملک بہتری کی طرف جائے گا۔
کوئی نگران حکومت نہیں آئے گی
ا یک سوال کے جواب میں وزیر داخلہ نے کہا کہ کوئی نگران حکومت نہیں آئے گی، حکومت اپنی آئینی مدت پوری کرے گی اور پاکستان میں جمہوری عمل آگے بڑھے گا۔
