وزیراعظم عمران خان نے سری لنکن مینجر کی جان بچانے کی کوشش کرنے والے ملک عدنان کو رول ماڈل قرار دے دیا۔
آج اسلام آباد میں سانحہ سیالکوٹ میں سری لنکن میجر کی جان بچانے کی کوشش کرنے والے ملک عدنان کے اعزاز اور آنجہانی پریانتھا کمارا کیلئے منعقدہ تعزیتی ریفرنس سے خطاب کرتے ہوئے وزیراعظم عمران خان کا کہنا تھا کہ مجھے خوشی ہے کہ سیالکوٹ کے افسوسناک واقعے میں حیوانوں کے ہجوم میں ایک بہادر انسان بھی تھا، ہمیں ملک عدنان پر فخر ہے، جس طرح انہوں نے سری لنکن شہری کی جان بچانے کی کوشش کی، ہمیں ملک عدنان جیسے رول ماڈلز کی ضرورت ہے۔
ملک عدنان کو خراج تحسین پیش کرتے ہوئے وزیر اعظم عمران خان نے کہا کہ ملک عدنان کو 23 مارچ کو تمغہ شجاعت دیا جائے گا۔اس موقع پر ملک عدنان کو تعریفی سند پیش کی گئی، تقریب میں وفاقی وزراء اور سری لنکن ہائی کمشنر بھی موجود تھے۔
Prime Minister @ImranKhanPTI awarded a certificate of appreciation to #MalikAdnan for the valour he showed to shield #PriyanthaDiyawadana against mob in #Sialkot. pic.twitter.com/TfbiQO6OBz
— Prime Minister’s Office, Pakistan (@PakPMO) December 7, 2021
بعد ازاں میڈیا سے گفتگو کرتے ہوئے ملک عدنان کا کہنا تھا کہ اس دن میرا جذبہ یہی تھا، یہی کوشش تھی کہ کسی طرح سری لنکن شہری کو بچا لوں، میں چاہتا تھا کہ کوئی ایسا واقعہ نہ پیش آ جائے جس سے ملک کا نام خراب ہو۔ ان کا مزید کہنا تھا کہ شاید یہ قتل اب قوم کیلئے ایک ٹرننگ پوائنٹ ثابت ہو، اور یہ واقعہ پورے پاکستان کی سوچ کو بدل کر رکھ دے، کیونکہ سوچ بدلے گی تو آنے والی نسلوں کی بہتر پرورش ہو سکے گی۔
