پاکستان کرکٹ بورڈ نے آسٹریلوی کرکٹر جیمز فالکنر کے پاکستان سپر لیگ کھیلنے پر تاحیات پابندی عائد کر دی ہے۔
آسٹریلوی کرکٹر جیمز فالکنر کے غیر معقول رویے پر پاکستان کرکٹ بورڈ کی جانب سے جاری کئے گئے اعلامیے میں کہا گیا ہے کہ پی ایس ایل کی تمام فرنچائزز اور بورڈ نے متفقہ طور پر یہ فیصلہ کیا ہے کہ کوئٹہ گلیڈی ایٹرز کی نمائندگی کرنے والے جیمز فالکنر آئندہ پی ایس ایل ڈرافٹس میں شامل نہیں کیا جائے گا۔
اعلامیے میں کوئٹہ گلیڈی ایٹرز اور پی سی بی کی جانب سے جیمز فالکنر کی جانب سے معاوضے کی عدم ادائیگی کے الزامات کو مسترد کرتے ہوئے کہا کہ دسمبر 2021ء میں جیمز فالکنر کے ایجنٹ نے معاوضے کی ادائیگی کیلئے اپنے برطانوی بینک اکاؤنٹ کی تصدیق کی، جسے ریکارڈ میں شامل کر لیا گیا، لیکن جنوری 2022ء میں جیمز فالکنر کے ایجنٹ نے آسٹریلوی آن شور اکاؤنٹ کی تفصیلات شیئر کیں لیکن اس وقت تک جیمز فالکنر کی 70 فیصد ادائیگی برطانیہ کے آف شور بینک اکاؤنٹ میں منتقل کردی گئی تھی اور جیمز فالکنر نے خود اس منتقلی کی تصدیق بھی کی تھی۔
PCB and Quetta Gladiators strongly refute James Faulkner’s baseless allegations
More details ⤵️https://t.co/AwAOWjF126
1/2 pic.twitter.com/cR3Il1MKTd— Pakistan Cricket (@TheRealPCB) February 19, 2022
پی سی بی اور کوئٹہ گلیڈی ایٹرز کے مشترکہ اعلامیے میں کہا گیا ہے کہ معاہدے کے مطابق جیمز فالکنر کو 70 فیصد ادائیگی کی جا چکی ہے اور 30 فیصد ادائیگی پی ایس ایل کے اختتام کے 40 روز کے دوران کی جانی تھی، لیکن کرکٹر کے غیر پیشہ وارانہ رویے کے باعث اب 30 فیصد رقم پر بھی نظر ثانی کی جائے گی۔ پی سی بی کا کہنا ہے کہ برطانوی بینک اکاؤنٹ میں 70 فیصد رقم کی منتقلی کے باوجود جیمز فالکنر بضد تھے کہ وہی رقم اب آسٹریلوی آن شور بینک اکاؤنٹ میں بھی کی جائے، یعنی انہیں ڈبل ادائیگی کی جائے۔
اعلامیے میں بتایا گیا کہ جیمز فالکنر نے عدم ادائیگی کی صورت میں جمعے کے روز ملتان سلطانز کیخلاف اہم میچ نہ کھیلنے کی دھمکی کی دی تھی، لیکن بورڈ نے توہین آمیز رویے کے باوجود انہیں یقین دلایا کہ ان کی شکایت کا ازالہ کیا جائے گا، لیکن وہ اپنے فیصلے پر بضد رہے اور واپسی کے انتظامات کرنے کی ہدایت کی۔ جیمز فالکنر نے روانگی سے قبل ہوٹل کی املاک کو بھی نقصان پہنچایا اور امیگریشن حکام کیساتھ بھی گالم گلوچ کی۔
اعلامیے میں کہا گیا ہے کہ پی سی بی نے فرنچائزز انتظامیہ کیساتھ مل کر متفقہ فیصلہ کیا ہے کہ آئندہ جیمز فالکنر کو ڈرافٹنگ کا حصہ نہیں بنایا جائے گا۔
