فن لینڈ کی  سیکورٹی خدشات کے مدنظر نیٹو میں شمولیت کی درخواست کے بعد روس نے فن لینڈ کو گیس  کی سپلائی بند کرنے کا فیصلہ کیا ہے۔

عالمی خبر رساں ادارے کی رپورٹ  کے مطابق نیٹو کی رکنیت کیلئے درخواست دینے کے بعد روس نے فن لینڈ کو قدرتی گیس کی برآمد روکنے کا فیصلہ کیا ہے۔

 روسی سرکاری توانائی کے ادارے Gazprom نے فن لینڈ کی کمپنی Gasum کو اس فیصلے سے خبردار کردیا ہے۔ میڈیا رپورٹس میں بتایا گیا ہے کہ روس ہفتے کی صبح 4 بجے سے فن لینڈ کو سپلائی میں کمی کرنا شروع کردے گا۔

کریملن کی جانب سے جاری بیان میں کہا گیا ہے کہ اس نے یہ فیصلہ اس لیے کیا کیونکہ فن لینڈ نے روبلز کرنسی میں گیس کی ادائیگی سے انکار کیا جس کا مطالبہ پیوٹن حکومت نے مغربی پابندیاں عائد کئے جانے کے بعد کیا تھا۔

اس کے برعکس عالمی دفاعی تجزیہ کاروں کا کہنا ہے  کہ بلغاریہ اور پولینڈ کی گیس سپلائی بند کرنے کے بعد فن لینڈ کی یہ حالیہ بندش نیٹو میں شامل ہونے کی درخواست سے منسلک ہے۔